ShQO-da jer úılerde órt qaýipsizdigi talaptaryn buzǵan 17 myńǵa jýyq derek anyqtaldy

ÓSKEMEN. KAZINFORM – Shyǵys Qazaqstan oblysyndaǵy jer úılerde órt qaýipsizdigi talaptaryn buzýdyń 17 myńǵa jýyq dereki anyqtaldy.

ShQO tótenshe jaǵdaılar departamenti baspasóz qyzmetiniń málimetine súıensek, jyl basynan beri óńir boıynsha 33 ret peshten órt shyqqan. 

- Ásirese demalys kúnderi órt kóbeıedi. Óıtkeni sol kezde jurttyń deni monsha jaǵyp jatady. Jylytý maýsymy bastalǵaly qutqarýshylar órttiń aldyn alý jumystaryn júrgizýde. Osy ýaqytqa deıin barlyǵy 138 000-nan astam tekseris jasaldy. Sonyń nátıjesinde jer úılerde órt qaýipsizdigi talaptaryn buzýdyń 17 myńǵa jýyq dereki anyqtaldy, - delingen aqparatta.

Osy rette, TJD mamandary úıdi peshpen jylytqan kezde órtten qalaı saqtaný qajettigin túsindirdi. 

- Órttiń jáne ıis tııýdiń aldyn alý úshin birqatar saqtyq sharasyn qaperińizde ustańyz. Pesh pen murja sylanǵan, aqtalǵan bolýy qajet. Jylytý maýsymy kezinde murjany eki aıda keminde bir ret tazalaý kerek. Peshtiń mańaıyna, ústine kıim jaıyp, aıaq kıim keptirýge, jıhazdy peshke jaqyn qoıýǵa tyıym salynady. Sonymen qatar pesh jaqqan kezde otty tez tutatatyn suıyqty paıdalanýǵa, janyp jatqan peshti qaraýsyz qaldyrýǵa bolmaıdy. Peshti únemi tekserip, sańylaýy bolsa bitep tastaǵan abzal, - deıdi mamandar.

Eske salsaq, buǵan deıin elordada TJM qyzmetkerleri kóp qabatty turǵyn úıdegi órt kezinde er adamdy qutqarǵany habarlanǵan.