ShQO-da jer úıden órt shyǵyp, 68 jastaǵy áıel kóz jumdy

ÓSKEMEN. QazAqparat – Shyǵys Qazaqstan oblysy Glýbokoe aýdanynda jer úıden órt shyǵyp, 68 jastaǵy áıel kóz jumdy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Ývarovo aýylynda jer úıdiń kireberisi men shatyry otqa oranǵan. Sol kezde úıde birneshe adam, onyń ishinde 5 jasar bala boldy.

«Úı ıesi kórshi turatyn kúıeý balasyn kómekke shaqyrǵan. Evgenıı Shımın esimdi azamat lezde kómekke kelip, balany úıden alyp shyqty. Úı ıesi de syrtqa shyǵyp úlgergen. Alaıda úıge qonaqqa kelgen 68 jastaǵy áıel ýlanyp, qutqarýshylar jetkenshe kóz jumdy», - delingen aqparatta.

Kóp uzamaı jalpy aýdany 56 sharshy metrdi quraǵan tilsiz jaý tolyqtaı aýyzdyqtaldy. Boljam boıynsha qyzyl jalynnyń shyǵý sebebi - elektr symdaryn ornatý jáne paıdalaný kezinde órt qaýipsizdigi talaptaryn saqtamaýdan nemese otty abaısyz qoldanýdan bolýy múmkin.