ShQO-da jer úıde órt shyǵyp, 91 jastaǵy keıýana kóz jumdy

ÓSKEMEN. QazAqparat – Shyǵys Qazaqstan oblysy Altaı aýdanynda jer úıde órt shyǵyp, 91 jastaǵy keıýana kóz jumdy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Altaı qalasyndaǵy Zapadnaıa kóshesinde ornalasqan jer úıde órt shyqqan. Qyzyl jalyn úı mańyndaǵy sharýashylyq qora-jaıǵa da jaıyldy.

«Oqıǵa ornyna órt sóndirýshiler shuǵyl kelip jetti. Úı ishine barlaý júrgizý barysynda jatyn bólmeden 91 jastaǵy keıýananyń denesi tabyldy. Al aıaq-qolyn kúıik shalǵan 61 jastaǵy áıeldi jedel járdem dárigerleri aýrýhanaǵa alyp ketti», - delingen aqparatta.

Kóp uzamaı jalpy aýdany 100 sharshy metrdi quraǵan tilsiz jaý tolyqtaı aýyzdyqtaldy. Órtpen kúreske barlyǵy 3 tehnıka men jeke quramnan 10 adam jumyldyrylǵan.

Jalynnyń naqty neden shyqqany ázirge belgisiz.