ShQO-da jer úı órtenip ketti, bir adam jansaqtaý bólimine tústi

ÓSKEMEN. QazAqparat – Shyǵys Qazaqstan oblysy Rıdder qalasynda jer úıde órt shyǵyp, denesin kúıik shalǵan er adam jansaqtaý bólimine jetkizildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 29 sáýirde túngi saǵat 03.00 shamasynda Tsentralnyı kóshesindegi jeke turǵyn úıde órt shyqqan. Oqıǵa ornyna qutqarýshylar shuǵyl kelip jetti.

«Tilsiz jaý úı qabyrǵasyn, tóbesi men edendi sharpyǵan. Ot lezde monshaǵa, jazǵy asúıge jáne garajda turǵan 3 traktorǵa tarap ketti. Jedel áreket etken órt sóndirýshiler 134 sharshy metr alańdaǵy jalyndy aýyzdyqtap, kórshi úıge taralýynyń aldyn aldy. Órttiń saldarynan beti men aıaǵyn termııalyq kúıik shalǵan 1986 jylǵy azamatty jedel járdem dárigerleri Rıdder qalalyq aýrýhanasyna jetkizdi. Qazirgi ýaqytta ol jansaqtaý bóliminde jatyr», - delingen habarlamada.

Qyzyl jalyndy óshirýge jeke quramnan 15 adam men 3 tehnıka jumyldyrylǵan. Órttiń shyǵýyna – otty abaısyz paıdalaný sebep boldy.