ShQO-da jer silkinisi kezindegi is-qımyldar boıynsha oqý-jattyǵý ótip jatyr
ÓSKEMEN. KAZINFORM – Shyǵys Qazaqstan oblysynda jer silkinisi kezindegi is-qımyldar boıynsha oqý-jattyǵý ótip jatyr.
Oqý-jattyǵýdy úılestirý jónindegi respýblıkalyq shtab Shyǵys Qazaqstan oblysy Óskemen qalasynda ornalasqan. «Jer-2024» respýblıkalyq komandalyq-shtabtyq oqý-jattyǵýlarynyń birinshi kúni qarqyndy bastaldy. Oǵan QR Tótenshe jaǵdaılar vıtse-mınıstri Erlan Nurpeıisov pen Shyǵys Qazaqstan oblysynyń ákimi Ermek Kósherbaev qatysty.
Jattyǵýdyń alǵashqy kúninde jer silkinisi qaýpi týyndaǵan kezdegi birinshi kezekte júrgiziletin sharalar pysyqtaldy. Qutqarý qyzmetteriniń birlesken is-qımyldaryn pysyqtaý jáne úılestirý úshin respýblıkalyq dalalyq shtab ornatyldy.
«Uıymdastyrylǵan dalalyq shtabta shartty joıqyn jer silkinisi saldarynan bolýy múmkin jaǵdaı, tótenshe jaǵdaıdyń saldaryn joıýǵa kúshter men quraldardyń daıyndyǵy týraly jedel top basshylarynyń baıandamalary tyńdaldy. Baıandamashylar óz qyzmetiniń baǵyttary boıynsha qabyldanǵan sheshimder men ótkizilgen is-sharalar týraly habardar etti. Jattyǵýdyń jospary boıynsha oblysta jer silkinisi boldy. TJM «Qazavıaqutqarý» tikushaǵy ushyp ótip, tabıǵı apattyń saldaryn, qıraǵan ǵımarattardyń sanyn tirkedi», - dep habarlady ShQO Tótenshe jaǵdaılar departamentiniń baspasóz qyzmeti.
Oblys turǵyndary sırenalardyń dabylyn estip, úılerin tastap, barlyq qala men aýdanda jumys isteı bastaǵan evakýatsııalyq pýnktterge jınaldy. Belgilengennen jáne qajetti kómek alǵannan keıin olar jaıaý kolonnalarmen, avtomobıl jáne sý kóligimen lagerge qaraı bettedi.
Shatyrly lagerde turǵyn úı jáne kommýnaldyq-turmystyq aımaqtar, medıtsınalyq pýnkt, tamaqtaný blogy, avtokólik turaǵy qarastyrylǵan. Tártip pen qaýipsizdikti qamtamasyz etý úshin lagerde polıtsııa qyzmetkerleriniń kezekshiligi uıymdastyryldy. Apattar medıtsınasy ortalyǵynyń mamandary dalalyq aýrýhanany ornalastyrdy. TJM psıhologtary men dárigerleri halyqqa shuǵyl kómek kórsetti.
«TJ vıtse-mınıstri Erlan Nurpeıisov dalalyq HQKO shatyrly lageriniń, gýmanıtarlyq kómek qabyldaý pýnktiniń jumys isteýiniń tehnıkalyq múmkindikterin qarap shyqty. Seısmıkalyq qaýipti óńirlerdiń turǵyndarymen seısmıkalyq jattyǵýlar ótkizildi. Zardap shekken halyqty qabyldaý pýnktteri ornatyldy. Apat aımaqtaryna óńirlerden kúshter men quraldardy usynýdy uıymdastyryldy. Qıraǵan jerlerde avarııalyq-qutqarý jumystaryn júrgizý úshin temir jol kóligimen kelgen ınjenerlik tehnıka túsirildi», - delingen aqparatta.
