ShQO-da jer máselesi ınvestorlardyń jolyn bógep tur

ÓSKEMEN. KAZINFORM – Shyǵys Qazaqstan oblysynda ınvestor tartý úshin jer máselesi basty kedergilerdiń biri bolyp otyr.

Oblys prokýratýrasynda ótken kásipkerlerdiń quqyqtaryn qorǵaý jónindegi front-keńse otyrysynda bıznes ókilderin alańdatqan ózekti máseleler talqylandy. Jıynǵa qadaǵalaýshy organ, «Kazakh Invest», «Atameken» kásipkerler palatasy, memlekettik mekemeler men kásip ıeleri qatysty.

Prokýratýra málimetinshe, jyl basynan beri óńirde 845 kásipkerdiń quqyǵy qorǵalǵan. Negizgi nazar – memlekettik organdar tarapynan jasalatyn qysymnyń aldyn alýǵa aýdarylyp otyr. Qazirdiń ózinde bir sheneýnik ákimshilik jaýapkershilikke tartylǵan.

- Búginde 6 ınvestıtsııalyq joba prokýratýranyń súıemeldeýimen júzege asyrylyp jatyr. Alaıda olardyń barlyǵy derlik birdeı kedergilerge tap boldy, ol – jer telimderin rásimdeý, jalǵa alý merzimin uzartý. Barlyǵy únemi jer máselesine kelip tireledi, - delingen aqparatta.

Otyrysta erekshe nazar aýdarylǵan taǵy bir jaıt – «Zareche» eko-qonaqúıiniń jaǵdaıy. Ondaǵy ınvestor týrızm nysandaryn keńeıtý úshin jer telimin paıdalanýdyń nysanaly maqsatyn aýyl sharýashylyǵynan rekreatsııalyq maqsatqa ózgerte almaı áýrege túsken.

- Bizge qonaq úıler men týrıstik ınfraqurylym salý úshin nebári eki gektar jer qajet. Qalǵan aýmaq burynǵysha mal jaıylymy men shabyndyq retinde paıdalanyla beredi. Sharýashylyqta mal da ustaımyz, - dedi qonaqúı dırektory Svetlana Froımchýk.

ShQO Jer qatynastary basqarmasynyń basshysy Nadejda Mıheılıstiń aıtýynsha, mundaı daýlar Samar aýdanynda da kezdesken. Onda aýdandyq ákimdik sot sheshimderine súıene otyryp jer telimderiniń nysanaly maqsatyn ózgertýge ruqsat bermeı qoıǵan.

- Oblystyq Mamandandyrylǵan ekonomıkalyq sotynyń aýyl sharýashylyǵy jerlerin basqa maqsatqa aýystyrýǵa tyıym salatyn qaýlylary bar. Alaıda bul máseleni jerdi aımaqtarǵa bólý arqyly qaıta qaraýǵa bolady, - dedi basqarma basshysy.

Másele qadaǵalaýshy organnyń da baqylaýyna ilikti. ShQO prokýrorynyń birinshi orynbasary Meıram Taýtenov jaǵdaıdy jan-jaqty qarap, naqty sheshim qabyldaýdy tapsyrdy. Sondaı-aq ol kásipkerlerge daýly máseleler boıynsha prokýratýraǵa júginýden qoryqpaýǵa keńes berdi.

- Habar neǵurlym erterek tússe, biz de soǵurlym tezirek áreket etip, quqyqtaryńyzdy qorǵaı alamyz, - dedi M.Taýtenov.

Eske salsaq, osyǵan deıin SQO-da bógetterdiń qurylysyna qatysqan kásipkerler tıisti aqshalaryn ala almaı júrgeni habarlanǵan.