ShQO-da jer qoınaýyn paıdalanýshylardan aqsha bopsalaǵan eki azamat ustaldy
ASTANA. KAZINFORM – Qarjylyq monıtorıng agenttiginiń Shyǵys Qazaqstan oblysy boıynsha departamenti jer qoınaýyn paıdalanýshylardan aqsha alý shemasyn uıymdastyrǵan eki azamatqa qatysty alaıaqtyq deregi boıynsha sotqa deıingi tergep-tekserýdi aıaqtady.
Vedomstvonyń málimetinshe, 2025 jylǵy qyrkúıek aıynda Samar aýdanyna qarasty «Keńqaryn» ýchaskesinde «Qulynjon» ózeniniń arnasyn óz betinshe ózgertý arqyly baǵaly metaldardy zańsyz óndirýmen aınalysqan adamdar tobynyń áreketi áshkerelenip, toqtatylǵan.
Atalǵan zańsyz áreketterdiń saldarynan keltirilgen ekologııalyq zalal kólemi 54 mln teńgeden asqan.
- Tergeý barysynda qylmyskerler osy jaǵdaıdy paıdalanyp, kúdiktilerdiń birine qatysty qamaýda ustaý túrindegi bultartpaý sharasyn neǵurlym jeńil túrine ózgertýge kómektesemiz degen jeleýmen 10 myń AQSh dollaryn talap etkeni anyqtalǵan.
Qabyldanǵan jedel-izdestirý sharalarynyń nátıjesinde atalǵan tulǵalar aqshany alý sátinde qolǵa túsken, - dep jazdy QMA.
Sot úkimimen olar 2 jyl 6 aı merzimge bas bostandyǵyn shekteý jazasyna kesildi. Úkim zańdy kúshine engen joq.
Aıta keteıik, ShQO-da kásipkerlik qyzmetke zańsyz aralasqany úshin 2 laýazymdy tulǵa jaýapqa tartyldy.