ShQO-da jer qoınaýyn paıdalaný talaptaryn buzǵan kásiporyndarǵa aıyppul salyndy

ÓSKEMEN.KAZINFORM – Shyǵys Qazaqstan oblysynda jer qoınaýyn paıdalanatyn kompanııalarǵa qatysty ekologııalyq tekserý nátıjeleri jarııalandy. 

ShQO Ekologııa departamentiniń málimetine súıensek, búginde óńir boıynsha jer qoınaýyn paıdalanatyn 484 mekeme tirkelgen. Onyń ishinde 108 kelisimshart keń taralǵan paıdaly qazbalardy, 306 kelisimshart qatty paıdaly qazbalardy barlaý jáne óndirýge tıesili. I sanatqa jatatyn 64 kásiporynnyń 23-i qorshaǵan ortaǵa aıtarlyqtaı áser etedi.

– Osy jyldyń 10 aıynda ekologtar 8 jospardan tys tekseris júrgizip, birqatar zańbuzýshylyqty anyqtady. Onyń ishinde geologııalyq barlaý jáne óndirý jumystaryn ekologııalyq ruqsatsyz júrgizý, topyraq pen sý aıdyndaryn lastaý, ekologııalyq saraptama talaptaryn jáne qaldyqtarmen jumys isteý erejelerin buzý faktileri tirkelgen, - delingen aqparatta. 

Nátıjesinde «East Copper» JShS, «Altai GeoTechnology» JShS, «PROFIT S» JShS, «KASKAD-N» JShS jáne birqatar jeke kásipker ákimshilik jaýapkershilikke tartyldy. Salynǵan aıyppul kólemi – 9,7 mln teńge. 

Aıta keteıik, qazir «VSAM Prodakshn», «Maralıha», «Maralıha Gold» JShS-ǵa qatysty qosymsha tekserister júrgizilip jatyr. Sondaı-aq «GRK MLD» jáne «KOGODAI» kásiporyndaryna profılaktıkalyq baqylaý josparlanǵan.

Eske salsaq, osyǵan deıin ShQO-da kásiporynnyń sarqyndy sýy dalaǵa tógilip kelgeni habarlanǵan.