ShQO-da jer qazyp jatqanda topyraq opyrylyp, 2 jumysshy qaza boldy
ÓSKEMEN. KAZINFORM — Shyǵys Qazaqstan oblysy Úlken Naryn aýdanynda sý qubyry jarylǵan jerde apatty qalpyna keltirý jumystaryn júrgizip jatqan 2 jumysshy kóz jumdy.
Jumysshylar apatty qalpyna keltirý jáne jer qazý jumystaryn júrgizip jatqanda topyraq opyrylyp ketken. Sonyń saldarynan «Naryn KomHoz Servıs» kommýnaldyq kásipornynyń eki qyzmetkeri — 42 jastaǵy dánekerleýshi Erjan Aıtpaev jáne 55 jastaǵy slesar Sergeı Kasterın qaza boldy.
Tekserý jumystaryn júrgizý úshin arnaıy komıssııa qurylyp, sol jerge oblys ákimi Nurymbet Saqtaǵanov bardy. Ákim komıssııa múshelerine óndiristik jáne eńbek qaýipsizdigin qamtamasyz etýge qatysty qoldanystaǵy reglamentterdi túbegeıli qaıta qaraý qajettigin aıtty.
— Beıbit, turaqty ýaqytta óndiristik qaýipsizdik talaptarynyń buzylýynan adam óliminiń bolýy múlde jol berilmeıtin jaǵdaı. Qyzmetkerlerdiń ómiri men densaýlyǵy kez kelgen kásiporyn úshin eń joǵary basymdyqta bolýy tıis. Ákimdik atynan marqumdardyń otbasylaryna shyn júrekten kóńil aıtyp, biz olarǵa jan-jaqty qoldaý kórsetetimizdi jetkizgim keledi. Sonymen qatar tıisti organdarǵa oqıǵanyń sebepterin anyqtap, oǵan kináli adamdardyń jaýapkershiligin belgileý úshin jan-jaqty ári ádil tekserý júrgizýdi tapsyrdym, — dedi Nurymbet Saqtaǵanov.
Eske salsaq, osyǵan deıin Aqtóbede qaza bolǵan jumysshylardyń otbasy shyǵyndy óndirip alǵany jaıly jazǵanbyz.