ShQO-da jer qazyp jatyp kóz jumǵan 2 jumysshyǵa qatysty tergeý aıaqtaldy
ÓSKEMEN. KAZINFORM — Shyǵys Qazaqstan oblysy Úlken Naryn aýdanynda sý qubyry jarylǵan jerde apatty qalpyna keltirý jumystaryn júrgizip jatyp kóz jumǵan 2 jumysshyǵa qatysty qyzmettik tergeý aıaqtaldy.
«Naryn KomHoz Servıs» kommýnaldyq kásipornynyń eki qyzmetkeri — 42 jastaǵy dánekerleýshi Erjan Aıtpaev jáne 55 jastaǵy temir ustasy Sergeı Kasterın opyrylǵan topyraq astynda qalyp qaza bolǵan edi.
Tergeý barysynda eńbek qaýipsizdigi talaptarynyń óreskel buzylǵany anyqtaldy. Jumys berýshi kináli dep tanylyp, oǵan qatysty qylmystyq is qozǵaldy.
— Eńbek kodeksine sáıkes, jumys berýshi qyzmetkerlerdiń ómiri men densaýlyǵyn qorǵaýǵa mindetti. Ol topyraqtyń jáne tehnıkanyń jaǵdaıyn aldyn ala tekserip, barlyq qaýipti faktor kórsetilgen arnaıy ruqsatnama-nusqaýlyq daıyndaýy tıis edi. Ár qyzmetker bul qujatpen tanysyp shyǵýy qajet. Eger qaýipsizdik talaptaryna sáıkessizdik anyqtalsa, jumys birden toqtatylýy kerek bolatyn, — dedi ShQO memlekettik eńbek ınspektsııasy basqarmasynyń basshysy Baqytbek Kızatov.
Eske salsaq, osyǵan deıin Jezqazǵanda kommýnaldyq jelilerdi jóndeý kezinde jumysshy qaza bolǵany habarlanǵan.