ShQO-da Jeńis kúnine oraı soǵys ardagerlerine 5 mln teńgeden berildi
ÓSKEMEN. KAZINFORM — Shyǵys Qazaqstan oblysynda Jeńis kúnine oraı soǵys ardagerlerine 5 mln teńge kóleminde birjolǵy materıaldyq kómek kórsetildi.
Qazirgi tańda óńirde alty ardager turady. Onyń beseýi Óskemen qalasynda, bireýi Glýbokoe aýdanynda. Olar merekege oraı 5 mln teńgeden aldy. Jalpy Jeńis kúni qarsańynda áleýmettik qoldaý sharalarymen oblystyń 3 myńnan astam turǵyny qamtylǵan.
— Soǵys ardagerlerinen bólek, basqa da sanattaǵy azamattarǵa kómek kórsetildi. Atap aıtqanda, memlekettik nagradalarmen marapattalǵan tyl eńbekkerlerine, burynǵy kontslager tutqyndaryna, Lenıngradta qorshaýda bolǵan turǵyndarǵa, qaza tapqan áskerı qyzmetshilerdiń jesirleri men jubaılaryna 130 myń teńgeden berildi. Nagradasy joq tyl eńbekkerleri 80 myń teńgeden aldy, — dep habarlady ShQO Óńirlik kommýnıkatsııalar qyzmetinen.
Sonymen qatar ardagerler úshin sanatorıı-kýrorttyq emdeý qarastyrylǵan. Bul maqsattaǵy shyǵyndarǵa qarajat jergilikti bıýdjetten bólinedi.
Eske salsaq, osyǵan deıin Almatyda Jeńis kúnine oraı 15 ardagerge birjolǵy tólem berilgeni habarlanǵan.
