ShQO-da Jeńis kúnine oraı «Men batyrdyń urpaǵymyn!» atty chellendj bastaldy
Mamyrdyń 5-ine deıin jalǵasatyn chellendjdi ShQO ishki saıasat basqarmasyna qarasty óńirlik «Rýhanı jańǵyrý» ortalyǵy bastaǵan.
«Biz sizderdi Jeńis kúni qarsańynda uıymdastyrylǵan chellendjge qatysýǵa shaqyramyz. Ol úshin YouTube , Instagram jáne Facebook jelisindegi «Rýhanı jańǵyrý - Shyǵys Qazaqstan» toptaryna tirkelip, otbasylyq muraǵattan soǵysqa qatysqan týǵan-týystaryńyzdyń (jaýyngerler men tyl eńbekkerleriniń) sýretterin taýyp, jelige júkteý qajet», - dep habarlady ortalyq mamandary.
Sondaı-aq júktelgen sýrettiń tarıhy týraly qysqasha aqparat jazý kerek. Qatysýshylar bul aqparatty vıdeo túrinde de usyna alady.
«Chellendjdi dos-jarandaryńyzǵa estafeta retinde usynýǵa bolady. Bul bastamamyzǵa jastarmen qatar aǵa býyn ókilderi de qatysady dep senemiz» delingen málimette.
