ShQO-da jeńil kólik traktormen soqtyǵysyp, eki adam mert boldy
ASTANA. QazAqparat - Shyǵys Qazaqstan oblysynyń Úrjar aýdanynda «Toıota» avtokóligi traktordyń tirkemesine soqtyǵysyp, jol apaty saldarynan jeńil kóliktiń júrgizýshisi men onyń jolaýshysy qaza boldy, dep habarlaıdy «QazAqparat» HAA tilshisi.
Qaıǵyly oqıǵa Taskesken men Úrjar aýyldarynyń arasynda 13 tamyz kúni keshki saǵat 21:00-22:00 aralyǵynada tirkelgen.
«Úrjar aýylyna bara jatqan «Toıota mark 2» jeńil avtokóligi aldynda kele jatqan tirkemesi bar traktordy ozbaq bolǵan. Alaıda jeńil avtokólik qaýipsiz araqashyqtyqty saqtamaı, traktordyń tirkemesine soqtyǵysqan. Saldarynan jeńil kóliktiń 1985 jylǵy júrgizýshisi men 1942 jylǵy jolaýshysy alǵan jaraqattardan oqıǵa ornynda mert boldy», - dep habarlady ShQO ІІD baspasóz qyzmetiniń bastyǵy Baqytjan Torǵaev.
ShQO ІІD baspasóz qyzmetinen sondaı-aq, «Toıota mark 2» avtokóliginiń taǵy úsh jolaýshysy ár túrli dene jaraqattarymen aýrýhanaǵa jetkizilgenin habarlady. Polıtsııa qyzmetkerleri QR QK 345-baby boıynsha qylmystyq is qozǵady. Іs boıynsha saraptamalar taǵaıyndalyp, jol-kólik oqıǵasynyń sebebi anyqtalyp jatyr.
