ShQO-da jeńil kólik pen KamAZ soqtyǵysyp, 3 adam aýrýhanaǵa jetkizildi
ÓSKEMEN. QazAqparat – Shyǵys Qazaqstan oblysynda jeńil kólik pen KamAZ soqtyǵysyp, 3 adam aýrýhanaǵa jetkizildi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, jol-kólik oqıǵasy 21 tamyz kúni «Óskemen Altaı» tasjolynda bolǵan.
Toıota avtokóligi men KamAZ soqtyǵysyp qaldy.
«Jol apaty saldarynan úsh adam zardap shekti. Eki adamdy jedel járdem qyzmetkerleri alyp ketti. Al jeńil avtokóliktiń 1976 jyly týǵan júrgizýshisine Apattar medıtsınasy ortalyǵynyń dárigerleri sol jerde alǵashqy medıtsınalyq kómek kórsetti. Sodan keıin ol birinshi qalalyq aýrýhanaǵa jetkizilgen», - delingen aqparatta.
Belgili bolǵandaı, er adamǵa moıyn jaraqaty dıagnozy qoıyldy.
Jol apatynyń mán-jaıy men kimniń kináli ekendigin tártip saqshylary anyqtap jatyr.
