ShQO-da jemqorlyq jaıly habarlaǵandarǵa 4,5 mln teńge syıaqy berildi

ÓSKEMEN. QazAqparat – Shyǵys Qazaqstan oblysynda jyl basynan beri jemqorlyq jaıly habarlaǵan azamattarǵa 4,5 mln teńgeden astam syıaqy berildi, dep habarlaıdy QazAqparat tilshisi.

«Shyǵys – adaldyq alańy» jobalyq keńsesiniń basshysy Marjan Baqyttyń aıtýynsha, ótken jyldan bastap sybaılas jemqorlyq faktileri týraly habarlaǵan adamdardy kótermeleýdiń jańa júıesi engizilgen. Paraqorlyq jaıly shynaıy málimet bergenderge beriletin syıaqy – qylmystyń aýyrlyǵyna baılanysty 30-dan 100 AEK-ke deıingi mólsherdi quraıdy. Máselen, eger para nemese keltirilgen zalal mólsheri 50 mln teńge bolsa, onda sybaılas jemqorlyq faktisi týraly habarlaǵan adam sot úkiminen keıin 5 mln teńge alady.

«Jyl basynan bastap óńir boıynsha sybaılas jemqorlyq faktileri týraly habarlaǵan 6 azamatqa 4,5 mln teńge berildi. Syıaqynyń eń joǵary mólsheri 4 mln teńgeni, al eń tómengisi – 138 900 teńgeni quraǵan. Qylmysqa qarsy áreket etkender memlekettiń qorǵaýynda bolady. Olardyń jeke málimetteri memlekettik qupııa bolyp qalady», - dedi Marjan Baqyt.

Óz sózinde ol barsha shyǵysqazaqstandyqtardy belsendi azamattyq ustanym tanytýǵa jáne jemqorlyqqa tap bolǵan kezde bul týraly 1424 Call-ortalyǵyna nemese ShQO Sybaılas jemqorlyqqa qarsy qyzmetiniń kezekshi bólimine 8 [phone] nómiri boıynsha habarlasýǵa shaqyrdy.