ShQO-da jemqorlar týraly habarlaıtyndar sany artty
ÓSKEMEN. QazAqaparat - ShQO-da jyl basynan beri jemqorlyq áreketter týraly habarlaǵan adamdarǵa 456,9 myń teńge syıaqy tólengen. Bul týraly Sybaılas jemqorlyqqa qarsy is-qımyl ulttyq bıýrosynyń oblystyq departamenti basshysy Sergeı Potanın arnaıy brıfıngte aıtty, dep habarlaıdy QazAqparat tilshisi.
Sergeı Potanınniń aıtýynsha, halyqtyń sybaılas jemqorlyqpen kúres qyzmetine senimi arta bastaǵan.
«Turǵyndardan jemqorlyq faktileri týraly habarlamalar men aryz-shaǵymdardyń jıi túsýi bizdiń qyzmetimizge degen senimniń artqanyn kórsetedi. 2018 jyldyń alǵashqy 3 aıynda arnaıy komıssııa qundy aqparat usynǵan 6 adamdy materıaldyq turǵydan yntalandyrý máselesin talqylaǵan bolatyn. Nátıjesinde olarǵa 456,9 myń teńge syıaqy tólendi» - dedi departament basshysy.
Jalpy, jyl basynan beri Shyǵys Qazaqstan boıynsha 54 jemqorlyq qylmysy tirkelgen. Onyń ishinde 32 qylmys para alý boıynsha, 10 qylmys bótenniń múlkine qol salý boıynsha, 6 qylmys alaıaqtyq boıynsha qozǵalǵan. Osy isterge qatysy bar 38 adam jaýapqa tartylǵan.
