ShQO-da jeltoqsanda aıaz túsip, qalyń qar jaýady

ÓSKEMEN. KAZINFORM — Jeltoqsannyń alǵashqy kúnderinde-aq Shyǵys Qazaqstan oblysyna naǵyz qys keldi. Óńirde boran soǵyp, aıaz tústi.

«Qazgıdromet» RMK málimetinshe, jeltoqsan aıynyń basynda oblysta aýa raıy qubylmaly bolady.

— Jeltoqsannyń alǵashqy kúnderinde temperatýra 0…-8°C shamasynda saqtalady. Alaıda atmosferalyq fronttardyń ótýine baılanysty aýa raıy jıi qubylady. Qar jaýyp, boran soǵyp, kóktaıǵaq bolady. Shyǵys pen ońtústik-shyǵystyń taýly aımaqtarynda qar mol túsýi múmkin, — delingen aqparatta.

Negizgi ózgerister birinshi onkúndiktiń sońynda kútiledi. Bul kezeńde óńirge soltústik-batys antıtsıklony arktıkalyq aýa massalaryn ákeledi.

— Keı kúnderi túngi temperatýra -23°C-qa deıin tómendep, kúndiz -5…-13°C aralyǵynda bolady. Bul jeltoqsan úshin qalypty jaǵdaı, biraq aıdyń basymen salystyrǵanda aıyrmashylyq aıtarlyqtaı seziledi, — deıdi sınoptıkter.

Ekinshi jáne úshinshi onkúndikterde, ásirese túnde aıaz kúsheıe túsedi. Temperatýra -15…-20°C pen -5…-10°C aralyǵynda qubylyp, keı kezderde -25…-35°C-qa deıin tómendeýi múmkin. Kúndizgi ýaqytta aýa temperatýrasy nólge jaqyn nemese -10°C shamasynda bolady.

Sonymen qatar jeltoqsan aıynda qarly kúnder ashyq ári tynyq aýa raıymen almasyp otyrady. Keı jerlerde boran, tuman jáne kóktaıǵaq bolady.

Eske salsaq, buǵan deıin 3 jeltoqsanda aýa raıy kúrt ózgeretindigi habarlanǵan.