ShQO-da jeke turǵyn úıler 11 tıptik joba boıynsha salynady
ÓSKEMEN. QazAqparat - Shyǵys Qazaqstanda jeke turǵyn úıge arnalǵan shaǵyn aýdandar paıda bola bastady. Qazirdiń ózinde bul baǵytta 11 tıptik joba daıyn tur, - dep habarlaıdy QazAqparat tilshisi.
Oblys boıynsha jer telimine kezekte turǵandardyń sany 29 myń adamdy quraıdy. Oblystyń ákimi Danıal Ahmetov osy suranysty qanaǵattandyrý úshin Semeı men Óskemen qalalarynda jańa turǵyn aýdandar boı kóteretinin aıtty.
«Óskemen qalasynyń №28 turǵyn aýdanyna, Semeıdiń «Aqsaı, «Ushaqtar», «Komsomol» aýdandaryna ishki jáne magıstraldik jeliler tartýǵa jobalyq-smetalyq qujattar ázirlenýde» - dedi ol.
Ákimniń aıtýynsha, bıyl oblys aýmaǵynda 1,3 mln sharshy metr baspananyń qurylysy júredi. Onyń 400 myń sharshy metri jyl sońyna deıin qoldanysqa berilýi tıis.
Jańadan boı kóteretin yqsham aýdandarda barlyq úıler biryńǵaı sáýlet stılinde boı kótermek. Osylaısha ár aýdannyń ózine tán kelbeti bolady dep kútilýde.
Ótken jyly «Nurly jer» baǵdarlamasy boıynsha 39,1 mlrd teńgege 874,5 myń sharshy metr baspana salynyp, 380 myń sharshy metri qoldanysqa berildi. Ósim - 112 paıyz bolǵan.
