ShQO-da jeke kýáliksiz turyp jatqan 200-den astam adam anyqtaldy
ÓSKEMEN. QazAqparat – Shyǵys Qazaqstan oblysynda jeke kýáliksiz turyp jatqan 200-den astam adam anyqtaldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, kóshi-qon qyzmetiniń mamandary jeke basyn kýálandyratyn qujatsyz turatyn jáne 1974 jylǵy KSRO pasportyn ýaqtyly aýystyrmaǵan adamdardy anyqtaý boıynsha jumysty jalǵastyryp jatyr.
«Qujattardyń bolmaýy saldarynan olar áleýmettik tólemder, járdemaqylar men medıtsınalyq kómek ala almaıdy. Jyl basynan beri óńir boıynsha jeke kýáliksiz júrgen 200-den astam adam anyqtalǵan. Qazirgi ýaqytta barlyǵy Qazaqstan Respýblıkasynyń azamaty bolyp tanyldy», - delingen aqparatta.
Máselen, Óskemen qalalyq polıtsııa basqarmasyna Atyraý oblysynda týǵan 69 jastaǵy áıel júgindi.
Óz sózinde ol 1953 jyly ata-anasymen birge Óskemenge kóship kelgenin jetkizdi. Osynda orta mektepti bitirip, turmysqa shyǵyp, balaly bolǵan.
«Alaıda búgingi kúnge deıin, ıaǵnı 40 jyldan astam ýaqyt boıy áıel 1974 jylǵy tólqujatpen júrdi. Kóshi-qon qyzmetine júgingen soń mamandar oǵan jeke kýálik alý úshin qajetti qujattardy jınaýǵa kómek kórsetti. Sóıtip, azamatsha kópten kútken qujatty alyp, zeınetaqy rásimdedi», - delingen habarlamada.
