ShQO-da «jazany jeńildetemin» dep para alǵan Antıkor qyzmetkeri ustaldy

ASTANA. KAZINFORM — Shyǵys Qazaqstan oblysynda Sybaılas jemqorlyqqa qarsy qyzmettiń tergeýshisi para alǵan.

— Agenttiktiń jedel-izdestirý sharalarynyń nátıjesinde Shyǵys Qazaqstan oblysy boıynsha Sybaılas jemqorlyqqa qarsy qyzmettiń tergeýshisi áshkerelendi. Ol ózi tergep jatqan qylmystyq is kvalıfıkatsııasynyń aýyrlyǵyn jeńildetý úshin protseske qatysýshydan para aldy. Qazir sottyń sanktsııasymen tergeýshi qamaýǵa alyndy, para berýshi de qylmystyq jaýapkershilikke tartylady, — dedi Antıkordyń resmı ókili Danııar Bıgaıdarov vedomstvoda ótken baspasóz máslıhatynda.

Tergeý amaldary jalǵasyp jatyr.

— Qylmystyq is júrgizý kodeksiniń 201-babyna sáıkes tergeý múddesi úshin ózge aqparat jarııa etýge jatpaıdy, — dep eskertti Antıkor ókili.

Sondaı-aq brıfıng barysynda Túrkistan oblysy Jer resýrstary departamentiniń basshysy para aldy dep kúdikke ilingeni aıtyldy. 

Odan bólek, Sybaılas jemqorlyqqa qarsy is-qımyl agenttigi sottalǵan eks-vıtse-mınıstr Sáken Musaıbekovtiń jańa qyzmetke taǵaıyndalýyna qatysty túsinik berdi.