ShQO-da jaz shyqqaly beri 6 adam sýǵa ketti
ShQO Tótenshe jaǵdaılar departamenti baspasóz qyzmetiniń málimetine súıensek, maýsym aıynan bastap óńirde 6 adam, onyń ishinde 1 bala sýǵa batyp ketti.
«Kóz jumǵan adamdardyń barlyǵy jabdyqtalmaǵan orynda shomylǵan. Qazirgi ýaqytta qaıǵyly oqıǵalardyń aldyn alý maqsatynda polıtseılermen birlesip reıd júrgizilýde. Sonyń nátıjeleri boıynsha ÁQBtK-niń 364-babyna (ortaq sý paıdalaný qaǵıdalaryn buzý) sáıkes 10 adam jaýapqa tartylǵan. Sondaı-aq jaǵajaıda alkogoldi ishimdik ishken 3 azamat anyqtaldy», - delingen aqparatta.
Shyǵys Qazaqstan oblysy ákiminiń qaýlysymen aımaqta 116 ýchaskede shomylýǵa tyıym salynǵan.
«Shomylý oryndarynyń túbi tekserilip, tazartylýda. Demalys bazalarynyń ıelerimen 39 memorandým jasaldy. Bundaǵy maqsat – olarǵa tıesili jaǵajaılarda halyq qaýipsizdiginiń qamtamasyz etilýi. Óskemen qalasynda shomylýǵa arnalǵan 2 resmı oryn bar. Olar qazirgi ýaqytta demalýshylardy qabyldaýǵa daıyn. Jalpy oblysta sýǵa túsýge ruqsat etilgen jaǵajaı sany – 6», - delingen habarlamada.