ShQO-da jaz shyqqaly beri 15 adam sýǵa batyp ketti
ÓSKEMEN. QazAqparat – Shyǵys Qazaqstan oblysynda jaz shyqqaly beri 15 adam sýǵa batyp ketti, dep habarlaıdy QazAqparat tilshisi.
Oblystyq Tótenshe jaǵdaılar departamenti baspasóz qyzmetiniń málimetine súıensek, tyıym salynǵan jaǵajaılarǵa shomylýǵa baratyn óńir turǵyndary azaıar emes. Sýǵa túsý maýsymy bastalǵaly beri sý aıdyndarynda 15 adam, onyń ishinde 2 bala batyp ketti.
«Jaz basynan TJD mamandary ózen-kól jaǵalaýlaryna 2667 ret reıdke shyqty. Jurtshylyqqa nusqamalar berilip, jadynamalar taratyldy. Jergilikti atqarýshy organdarmen qaýipti ýchaskelerge 314 tyıym salý belgisi ornatyldy. Alaıda azamattardyń sýda qaza bolý jaǵdaılary olardyń eskertýlerdi elemeýinen bolyp jatyr», - delingen aqparatta.
Qutqarýshylar men polıtseıler bıyl sýǵa batyp bara jatqan 11 adamǵa der kezinde kómekke kelip úlgergen.
Jyl basynan beri QR ÁQBtK-niń 440-baby (qoǵamdyq orynda alkogoldi ishimdik ishý) boıynsha - 479 adam jáne 364-babyna (Qoǵamdyq sýdy paıdalaný erejelerin buzý) sáıkes - 205 demalýshy ákimshilik jaýapkershilikke tartylǵan.
