ShQO-da jaz bastalǵaly beri saıajaılarda 13 ret órt shyqty
ShQO Tótenshe jaǵdaılar departamenti baspasóz qyzmetiniń málimetine súıensek, saıajaılardaǵy órttiń negizgi sebepteri – otty abaısyz paıdalaný, pesh jáne elektr qurylǵylaryn qoldaný erejelerin buzý, qoqysty órtegen kezde ǵımarattardan normatıvtik qashyqtyqty saqtamaý.
«Oblys boıynsha jaz bastalǵaly beri saıajaılarda 13 ret órt shyqty. Sońǵy órt 26 maýsymda Óskemen qalasyndaǵy «Metallýrg-3» saıajaı qaýymdastyǵynda boldy. Qyzyl jalynnyń jalpy aýdany – 25 sharshy metrdi qurady. Kóp uzamaı órt tolyǵymen sóndirildi. Zardap shekken eshkim joq. Órttiń shyǵý sebebi boıynsha 2 nusqa qarastyrylýda, atap aıtqanda otty abaısyz paıdalaný jáne qasaqana órteý», - delingen aqparatta.
Saıajaılardaǵy órtterdi keıde jetýi qıyn joldyń saldarynan jyldam sóndirý múmkin bolmaı jatady. Sondyqtan turǵyndar barynsha saq bolyp, órt qaýipsizdigi erejelerin qatań saqtaǵany durys.