ShQO-da jaz bastalǵaly 20 adam sýǵa ketken
ÓSKEMEN. QazAqparat – Shyǵys Qazaqstan oblysynda 1 maýsymnan beri 20 adam sýǵa ketken. Bul týraly QazAqparat óńirdiń tótenshe jaǵdaılar departamentine silteme jasap habarlaıdy.
Shyǵys Qazaqstannyń tótenshe jaǵdaılar qyzmeti dabyl qaǵyp otyr. Aptap ystyqtan saıa izdegen jurt sý qoımalaryna umtylýdy ádetke aınaldyrǵan. Eń ókinishtisi, ózennen saıa izdep baryp, ajal taýyp jatqandardyń sany kóp.
«Keshe Óskemen qalasynda súńgýirler Ertis ózeninen 57 jastaǵy azamattyń denesin alyp shyqty. Jaǵadaǵy kıimderge qarap, onyń shomylý úshin ózenge ózi túskenin ańǵarýǵa bolady. Degenmen, naqty sebepteri anyqtalyp jatyr. Jalpy, 1 maýsymnan beri oblysta 20 adam sýǵa ketip qaıtys boldy», - delingen departamenttiń baspasóz aqparatynda.
Mamandardyń aıtýynsha, qaıǵyly jaǵdaıdyń kóbi shomylýǵa arnalmaǵan, arnaıy jabdyqtalmaǵan toǵandarda bolǵan. Ekinshi úlken sebep – ishimdik bolsa, sońǵy kezde úrlemeli matrastar da qaýipti quralǵa aınalǵan.
«Buryn júzýge arnalǵan úrlemeli matrastar juqa ári yqsham bolsa, qazir olar óte qalyń bolyp keledi. Mundaı quraldar sý betinde jel turǵanda qaýipti bolyp ketedi. Aýdarylǵan adamnyń oǵan qaıtadan minýi qıyn. Tipti qutqarýshylardyń ózi sý betinde jel turǵan kezde matrasty yryqqa kóndirý qıyn ekenin aıtady», - deıdi departamenttiń baspasóz qyzmetiniń basshysy Anastasııa Sklıar.
Departament ókili shomylý maýsymy bastalǵannan beri shyǵysqazaqstandyq qutqarýshylar 11 adamdy ajaldan arashalap qalǵanyn aıtady.
