ShQO-da ózen-kólderde qaýipsizdik sharalaryn saqtamaǵan 11 adam jaýapqa tartyldy
ÓSKEMEN. KAZINFORM – Shyǵys Qazaqstan oblysynda jaz bastalǵaly beri ózen-kólderde qaýipsizdik sharalaryn saqtamaǵan 11 adam jaýapqa tartyldy.
Sý aıdyndaryndaǵy jazataıym oqıǵalardyń aldyn alý maqsatynda qutqarýshylar, polıtseıler jáne kóliktik baqylaý ınspektsııasynyń qyzmetkerleri jappaı demalys oryndaryn baqylap jatyr.
«Sońǵy reıdterdiń biri Buqtyrma sý qoımasynda júrgizildi. Demalýshylar arasynda júzý quraldary men katamarandarǵa qutqarý keýdeshelerin kımeı mingender, jabdyqtalmaǵan oryndarda shomylǵandar anyqtaldy. Halyqqa jan-jaqty túsindirý jumystary júrgizilip, eskertpe qaǵazdary taratyldy», - deıdi ShQO TJD bastyǵynyń orynbasary Qýatbek Kenjebekuly.
Shomylý maýsymy bastalǵaly beri óńir boıynsha barlyǵy 713 reıd júrgizilgen. Sonyń nátıjesinde qaýipsizdik sharalaryn saqtamaǵan 11 adam ÁQBtK-niń 412-baby boıynsha ákimshilik jaýapkershilikke tartyldy.
Osy rette, qutqarýshylar demalýshylarǵa kelesi erejelerdi qatań saqtaý qajettigi týraly eskertti:
- Tek jabdyqtalǵan jaǵajaılarda shomylyńyz.
- Júzý quraldaryna otyrmas buryn qutqarý keýdeshesin kıińiz.
- Qaıyqtar men katamarandardan sýǵa sekirip súńgýge tyıym salynady.
- 16 jasqa deıingi balalarǵa eresektersiz júzý quraldarymen júrýge bolmaıdy.
- Qandaı da bir tótenshe jaǵdaı bolsa, birden «112» nómirine habarlasý qajet.
