ShQO-da jaz bastalǵaly alty adam sýǵa batyp ketti

ÓSKEMEN. KAZINFORM – Shyǵys Qazaqstan oblysynda shomylý maýsymy bastalǵaly alty adam sýǵa batyp ketti.

-Qaıǵyly jaǵdaıdyń barlyǵy shomylýǵa tyıym salatyn belgi ornatylǵan jerlerde boldy,-dep málimdedi ShQO TJD bastyǵynyń orynbasary Ishar Savazov.

Qutqarýshylardyń málimetterine qaraǵanda, óńirde qaýipsiz demalys úshin 25 jaǵajaı uıymdastyrylǵan. Al sýǵa túsýge tyıym salynǵan oryndar sany - 74. Qaıǵyly jaǵdaılardyń kópshiligi sol tyıym salynǵan oryndarda bolady. Ondaı jerler tekserilgen jáne ol jerlerde kóbine kúrt tereń bolyp ketetin, sý astynda shuńqyrlar, qatty aǵys, muzdaı sý kezdesetin jerler bolady.

- Adamdardyń sýǵa batýynyń basty sebebi qarapaıym qaýipsizdik erejelerin saqtamaý, óz kúshin asyra baǵalaý bolyp tabylady. Adamdar eskertýlerdi elemeı, ómirleri men densaýlyqtaryn qaterge tige otyryp, sýdyń qaýipti bólikterine barady,-dedi Ishar Savazov.

Onyń sózinshe, ómirlerin qaýipke tikkennen bólek adamdarǵa ákimshilik aıyppul salynýy múmkin. Bıyl jaz maýsymy bastalǵaly 32 adamǵa aıyppul salyndy.

Qaıǵyly jaǵdaılardyń aldyn alý úshin ShQO Tótenshe jaǵdaılar departamentiniń ókilderi eriktilermen jáne jergilikti atqarýshy organdarmen birlesip, turaqty reıdter uıymdastyryp turady. Jaz bastalǵaly olar 1 320-dan astam túsindirý jumystaryn júrgizgen.

Osyǵan deıin ShQO-da aýyl halqyna qaýip tóndirgen Glýbochanka ózeniniń arnasy tereńdetilip jatqany týraly jazdyq.