ShQO-da jaz bastalǵaly 10 adam sýǵa ketti
ÓSKEMEN. KAZINFORM – Jaǵajaılar men sý aıdyndarynda patrýldeý kúsheıtilgenine qaramastan, Shyǵys Qazaqstan oblysynda jaz bastalǵaly 10 adam sýǵa ketti, dep habarlaıdy Kazinform tilshisi.
Qutqarýshylardyń málimetinshe, barlyq jaǵdaıda qaıǵyly oqıǵalarǵa qaýipsizdik erejelerin buzý, sonyń ishinde tyıym salynǵan jáne qaýipti jerlerde shomylý sebep bolǵan.
Aptap ystyqqa baılanysty qutqarýshylar resmı jaǵajaılarda ǵana emes, sý mańyndaǵy jabdyqtalmaǵan demalys oryndarynda da baqylaýdy kúsheıtti. Shomylý maýsymy bastalǵaly oblysta 1700-ge jýyq profılaktıkalyq is-shara ótkizildi.
Sonymen qatar sý aıdyndaryndaǵy qaýipsizdik erejelerin buzǵan 21 adam ákimshilik jaýapkershilikke tartyldy. Anyqtalǵan zań buzýshylyqtardyń arasynda balalardy sý mańynda qaraýsyz qaldyrý derekteri de bar.
Qutqarýshylar shaǵyn kólemdi kemelerdi de jeke baqylaýǵa alǵan. Maýsym bastalǵaly olardy paıdalaný erejelerin buzǵan taǵy 59 adamǵa qatysty ákimshilik shara qoldanyldy.
– Keme júrgizýshileri mindetti túrde qutqarý keýdeshelerin paıdalanýy, jolaýshylardyń ruqsat etilgen sanynan asyrmaýy, aýa raıyn eskerýi jáne qajetti qujattaryn ózimen birge alyp júrýi tıis. Alkogoldik masań kúıde sýǵa shyǵýǵa tyıym salynady, – dep eske saldy ShQO TJD baspasóz qyzmeti.
Sý aıdyndaryn patrýldeý jáne tótenshe jaǵdaılarǵa jedel áreket etý úshin qutqarýshylar qýatty qozǵaltqyshtarmen, navıgatsııa, baılanys jáne qajetti qutqarý quraldarymen jabdyqtalǵan katerlerdi paıdalanyp júr.
Profılaktıkalyq reıdter «Qaýipsizdikke baǵyt» aktsııasy aıasynda da ótkizilip jatyr. Shomylý maýsymynyń qalǵan kezeńinde qutqarýshylar jazataıym oqıǵa qaýpi joǵary jabdyqtalmaǵan «jabaıy» jaǵajaılarǵa erekshe nazar aýdarmaq.
ShQO TJD turǵyndardy tek arnaıy jabdyqtalǵan jáne shomylýǵa ruqsat etilgen jerlerdi tańdaýǵa, balalardy sý mańynda qaraýsyz qaldyrmaýǵa, júzý quraldarynda qutqarý keýdeshelerin paıdalanýǵa jáne aýa raıy buzylǵan kezde sýǵa shyqpaýǵa shaqyrdy.
Aıta keteıik, buǵan deıin shilde aıynyń basynan beri Qazaqstannyń sý aıdyndarynda 600-den astam zań buzýshylyq anyqtalǵany habarlanǵan.
