ShQO-da «Jaıly mektep» jobasy aıasynda 15 bilim ordasy boı kótermek
ShQO ákimdiginiń málimetine súıensek, «Jaıly mektep» ulttyq jobasy aıasynda óńir boıynsha 7800 oryndyq 15 bilim ordasy boı kóteredi.
«Qazirdiń ózinde Óskemendegi «Nurly jol» shaǵynaýdanynda jáne Zaısan aýdanynda salynyp jatqan mektepterdiń qurylysy aıaqtalýǵa jaqyn. Men Beloýsovka, Praporşıkovo nemese Opytnoe pole eldi mekenderindegi jaǵdaıdy egjeı-tegjeıli taldap, qaısysynda mektep salý kerektigin anyqtaýdy tapsyrdym», - dedi oblys ákimi Danıal Ahmetov.
Onyń aıtýynsha, Tavrııadaǵy 300 oryndyq jáne Rıdderdegi 600 oryndyq mektepterdiń tıptik jobalary ózin jaqsy dáleldegen.
«Bul zamanaýı, jaıly oqý oryndary. Olar barlyq qajetti zattarmen jabdyqtalǵan. Búgindegi bizdiń basty mindetimiz - qaı jerde jáne qansha mektep salý kerektigin naqty túsiný. Sebebi aımaqta oqýshylar sany kóp jáne bos oryndary jetkilikti mektepter bar. Sondyqtan olarǵa júkteme birkelki bólinýi úshin oqýshylardy avtobýspen jetkizýdi uıymdastyrýǵa daıynbyz», - dedi óńir basshysy.