ShQO-da jaıaý júrginshini qaǵyp óltirip, qashyp ketken júrgizýshi izdestirilip jatyr
ÓSKEMEN. QazAqparat – Shyǵys Qazaqstan oblysynda jaıaý júrginshini qaǵyp óltirip qashyp ketken júrgizýshi izdestirilip jatyr, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, jol-kólik oqıǵasy «Óskemen-Rahman qaınarlary» tasjolynda bolǵan.
«Markasy belgisiz avtokólikti tizgindegen júrgizýshi Altaı aýdanyndaǵy Vasılevka aýylynyń tusynda 40 jastaǵy er adamdy qaǵyp ketti. Jol apatynyń saldarynan aýyr dárejedegi dene jaraqatyn alǵan jábirlenýshi oqıǵa ornynda jan tapsyrǵan. Al kim ekendigi áli anyqtalmaǵan júrgizýshi bolsa sol jerden iz sýytty», - dep habarlady vedomstvo ókilderi.
Qazirgi ýaqytta atalǵan fakti boıynsha QR Qylmystyq Kodeksiniń 345-babyna sáıkes (Kólik quralyn basqarǵan adamnyń jol júrý erejelerin buzýynyń abaısyzda adam ólimine ákep soqtyrýy) boıynsha sotqa deıingi tergeý amaldary bastaldy.
