ShQO-da jatyr moıny obyry dıagnozymen esepte 1600-den astam áıel tur
ÓSKEMEN. QazAqparat – Shyǵys Qazaqstan oblysynda jatyr moıny obyry dıagnozymen esepte 1600-den astam áıel tur, dep habarlaıdy QazAqparat tilshisi.
ShQO Densaýlyq saqtaý basqarmasy baspasóz qyzmetiniń málimetine súıensek, óńir boıynsha jatyr moıny qaterli isiginiń aldyn alýǵa baǵyttalǵan aptalyq ótti. Sonyń aıasynda onkolog mamandar túsindirý jumystaryn júrgizip, áleýmettik jeli arqyly onlaın-efırler ótkizip, turǵyndardyń saýaldaryna jaýap berdi.
«Aýrýdyń aldyn alý úshin skrınıngten ótý qajet. Qaýipti dert der kezinde anyqtalsa jáne durys emdelgen jaǵdaıda saýyǵýǵa ábden bolady. Eń bastysy, ýaqtyly gınekolog mamanǵa qaralyp otyrǵan jón», - dedi oblystyq Onkologııa ortalyǵynyń dárigeri Ásel Qarabalaeva.
Onyń aıtýynsha, elimizde osy aýrýdyń aldyn-alýǵa baǵyttalǵan skrınıngtik baǵdarlama bar. Bul áleýmettik saqtandyrý qory arqyly qarjylandyrylady. Ol úshin áıel adam ózi tirkelgen emhanasynda gınekolog dárigerge júginýi kerek.
«Oblysta byltyr 80 myńǵa jýyq áıel adam skrınıgtik zertteýlermen qamtylyp, olardyń ishinde bul aýrý 27 áıelde bar ekeni anyqtalǵan. Jalpy aımaq boıynsha jatyr moıny obyry dıagnozymen esepte turǵan áıelder sany 1627 adamdy qurap otyr», - dedi Á.Qarabalaeva.
