ShQO-da jasóspirim áıeldi óltirdi degen kúdikpen ustaldy
ÓSKEMEN. KAZINFORM — Shyǵys Qazaqstan oblysy Zaısan aýdanynda áıeldiń qaza bolýyna qatysty qylmystyq is qozǵaldy. Kúdikke mektep oqýshysy iligip otyr.
ShQO Polıtsııa departamenti áıeldiń óltirilgenin rastady. Qylmys jasady degen kúdikpen jasóspirim ustalǵan. Sot ony qamaýda ustaýǵa sanktsııa berdi.
Atalǵan fakti boıynsha Qylmystyq Kodeksiniń 99-baby 1-bóligi boıynsha («Adam óltirý») qylmystyq is qozǵaldy.
Oqıǵaǵa qatysty áleýmettik jelide túrli aqparat tarap jatyr. Solardyń birinde qylmys jasóspirimder arasynda keń taraǵan «Kók kıt» oıynymen baılanysty bolýy múmkin degen boljam aıtylǵan. Keıbir jazbalarda jasóspirimge osy oıyn arqyly adam óltirý týraly tapsyrma berilgeni jazylǵan.
Alaıda bul aqparatty quqyq qorǵaý organdary rastaǵan joq. Polıtsııa tergeý múddesine baılanysty qylmystyń mán-jaıy men yqtımal sebepteri týraly aqparat jarııalamady.
— Qazirgi ýaqytta sotqa deıingi tergeý júrgizilip jatyr. Tergeýdiń tolyqtyǵyn, jan-jaqtylyǵyn jáne obektıvtiligin qamtamasyz etýge baǵyttalǵan qajetti sharalar júrgizilýde. QR Qylmystyq-protsestik kodeksi 201-babynyń talaptary boıynsha tergeý múddesine sáıkes ózge aqparat jarııa etilmeıdi, — dep habarlady ShQO Polıtsııa departamentinen.
Buǵan deıin Túrkistanda áıelin pyshaqtap óltirdi degen kúdikpen er adam qamaýǵa alynǵany týraly jazǵan bolatynbyz.
