ShQO-da jasyl energetıka jobasyn iske asyrýǵa jer máselesi qolbaılaý bolyp tur
ÓSKEMEN. KAZINFORM – Shyǵys Qazaqstan oblysynda balamaly energııa kózderin damytýǵa baǵyttalǵan keleshegi zor jobanyń júzege asyrylýy bógelip otyr.
Bul – Marqakól aýdanyndaǵy Qaljyr ózeninde shaǵyn sý elektr stantsııalarynyń kaskadyn salý jobasyna qatysty. «KALZHYR RIVER ENERGY» JShS bas dırektorynyń aıtýynsha, qýaty 16 megavatt bolatyn sý elektr stantsııasy oblystaǵy jańartylatyn energııa salasyndaǵy iri nysandardyń birine aınalýy múmkin.
Joba óńirdiń energııa qaýipsizdigin arttyrýǵa jáne kómir men munaıǵa táýeldilikti azaıtýǵa baǵyttalǵan. Energetıkter bul dástúrli energııa kózderiniń qorshaǵan ortaǵa aıtarlyqtaı zııan keltiretinin talaıdan beri aıtyp keledi.
– Biz tabıǵatqa áserdi barynsha azaıtyp, bıologııalyq ártúrlilikti saqtaýǵa umtylyp kelemiz. Alaıda qýatty arttyrý úshin jobany keńeıtý qajet. Al bul maqsattaǵy jer telimderiniń bir bóligi erekshe qorǵalatyn tabıǵı aýmaqqa kiredi, – deıdi kompanııa ókilderi.
Másele jerdiń quqyqtyq mártebesine tirelip otyr. ShQO Jer qatynastary basqarmasynyń basshysy Nadejda Mıheılıstiń túsindirýinshe, qoryq aımaǵynan tys jer ýchaskeleri áldeqashan bólinip qoıǵan. Qalǵany tek qoryqtar men erekshe qorǵalatyn aýmaqtarǵa tıesili, al ondaı jerlerdi paıdalanýǵa arnaıy tártippen ǵana ruqsat etiledi.
– Bul aýmaqtar tek strategııalyq mańyzdy nysandardy iske asyrý úshin paıdalanylýy múmkin. Osy jónindegi sheshimdi Úkimet basshysy qabyldaıdy. Al oǵan deıin Energetıka men Sý resýrstary jáne ırrıgatsııa mınıstrlikteriniń oń qorytyndysy qajet, – dedi Nadejda Mıheılıs.
Aıta keteıik, Qazaqstanda buǵan deıin de erekshe qorǵalatyn tabıǵı aýmaqtardan strategııalyq ınfraqurylymdyq jobalar úshin jer berilgen jaǵdaılar bolǵan. Biraq bul tek qatań ekologııalyq talaptardy saqtaý shartymen ǵana júzege asyryldy.
Bul másele prokýratýranyń da nazarynan tys qalǵan joq. ShQO prokýratýrasy jaǵdaıdy qosymsha zertteıtinin jáne quqyqtyq tetikter qarastyrylyp jatqanyn málimdedi.
Eske salsaq, osyǵan deıin BQO-da energetıkalyq jáne kommýnaldyq salada 6 jobany júzege asyrý kózdelip otyrǵany habarlanǵan.