ShQO-da jasandy uryqtandyrýǵa bólingen kvota jetkiliksiz
ÓSKEMEN. QazAqparat - Shyǵys Qazaqstanda 650 bedeý otbasy resmı túrde tirkelgen, shyn máninde olardyń sany odan da kóp, dep habarlaıdy QazAqparat Altaynews-ke silteme jasap.
Deneden tys uryqtandyrý ádisi (EKU) elimizge egemendik alǵan tusta kelip, perzentsiz otbasylar bala súıý múmkindigine ıe boldy. Biraq quny tym joǵary bolǵandyqtan, memleket arnaıy kvotalar bólýdi de qarastyrǵan edi. Alaıda ShQO-daǵy bedeý otbasylardyń barlyǵy bul kvotaǵa qol jetkize almaıdy.
Kvotamen tolyq qamtamasyz etýge qarjylandyrý jetkiliksiz bolyp shyqty. Bul másele ShQO Qoǵamdyq keńesiniń janyndaǵy densaýlyq saqtaý boıynsha jumys tobynyń otyrysynda talqylandy. Densaýlyq saqtaý basqarmasy basshysynyń orynbasary Ilııas Muhamedjannyń aıtýynsha, qazir oblysta 650 bedeý otbasy resmı túrde tirkelgen. Shyndyǵynda, olardyń sany odan da kóp. Oblysqa bir jylǵa tek 65 kvota ǵana bólinedi. Al Shyǵys Qazaqstan - respýblıka boıynsha týý kórsetkishi eń tómen aımaq.
«Bir juptyń ózine jasandy uryqtandyrý ádisin birneshe ret qoldanýǵa týra kelýi múmkin, - deıdi ol. - Mundaı protsedýranyń tıimdiligi ne bary 20-30 % ǵana. Kvotaǵa qarjy respýblıkalyq bıýdjetten bólinedi»,-dedi ol.
Atalǵan máseleni sheshý maqsatynda oblysymyzdyń dárigerleri ákimdikten qosymsha qarjy suraýǵa bel býyp otyr. Eger jergilikti bıýdjetten qarajat bólinse, jasandy uryqtandyrý ádisi Óskemendegi EKU ortalyǵynda júrgizilýi múmkin.
