ShQO-da jasandy jolmen qar kóshkinin túsirýge baılanysty jol jabylady

ÓSKEMEN. KAZINFORM – Shyǵys Qazaqstan oblysynda jasandy jolmen qar kóshkinin túsirýge baılanysty jol jabylady.  

ShQO Tótenshe jaǵdaılar departamenti baspasóz qyzmetiniń málimetine súıensek, 18 jeltoqsanda saǵat 9:00-de «Qazseldenqorǵaý» mekemesiniń qyzmetkerleri profılaktıkalyq maqsatta qar kóshkinin túsiredi.

– Atalǵan jaǵdaıǵa baılanysty «Óskemen-Altaı-Úlken Naryn-Katonqaraǵaı-Rahman qaınarlary» tasjolynyń 7-166 shaqyrymynda (Ýshanskoe aýyly men Altaı qalasynyń arasy) kóliktiń barlyq túri úshin jol qozǵalysyna tyıym salynady. Jospar boıynsha jol saǵat 16.00-ge deıin jabyq turady, - delingen aqparatta.

Osy rette, qutqarýshylar óńir jurtshylyǵyna joldardyń jaı-kúıin «Dármen» mobıldi qosymshasy arqyly bilip otyrýǵa keńes berdi. 

Eske salsaq, buǵan deıin ShQO-da boran men kóktaıǵaqqa baılanysty eki jolda kólik qozǵalysy shektelgeni habarlanǵan.