ShQO-da jasandy ıntellekt dárigerlerge dıagnoz qoıýǵa kómektesip jatyr
ÓSKEMEN. KAZINFORM – Shyǵys Qazaqstan oblysynda jasandy ıntellekt medıtsına salasynda belsendi qoldanylyp keledi.
Medıtsına salasynda jasandy ıntellekt múmkindikteri qalaı paıdalanylyp jatqanyn ShQO tsıfrlandyrý jáne arhıvter basqarmasynan málim etti.
- Óńirdiń barlyq turǵyndary elektrondy densaýlyq pasporttarymen qamtylǵan. PACS júıesi jasandy ıntellekt elementterin paıdalanyp, medıtsınalyq sýretterdi óńdeıdi jáne ókpe men sút bezi qaterli isigin qosa alǵanda, túrli patologııalardy avtomatty túrde anyqtaıdy. Bul dárigerlerdiń dıagnoz qoıý dáldigin arttyryp, medıtsınalyq qyzmet sapasyn jaqsartýǵa múmkindik berip otyr, - delingen aqparatta.
Budan bólek, jasandy ıntellekt beınebaqylaý derekterin taldaýda jáne qoǵamdyq qaýipsizdikti qamtamasyz etýde de qoldanylady. Qoǵamdyq kóliktiń jumysyn ońtaılandyrý maqsatynda avtomattandyrylǵan dıspetcherlik júıeler engizilip jatyr.
Aıta keteıik, jalpy Shyǵys Qazaqstandaǵy Óskemen, Rıdder jáne Altaı qalalarynda barlyǵy 5 839 beınebaqylaý kamerasy ornatylǵan. Qoǵamdyq jáne jol qaýipsizdigin arttyrý maqsatynda qosymsha 243 «Mergen» avtomattandyrylǵan kesheni jumys istep tur.
Eske salsaq, osyǵan deıin elordalyq mektepte oqýshylardyń qaýipsizdigi men tártibin jasandy ıntellekt baqylaıtyny habarlanǵan.