ShQO-da jas ónertapqysh tońazytqyshty ınkýbatorǵa aınaldyrdy
ÓSKEMEN. QazAqparat – Shyǵys Qazaqstan oblysy Zaısan qalasynda turatyn 12 jastaǵy Temirlan Erlanuly karantın kezindegi bos ýaqytyn tıimdi paıdalanýda. Jas ónertapqysh eski tońazytqyshtan jumyrtqadan balapan shyǵaratyn apparat jasady. Búginde onyń ınkýbatorynan 50 balapan shyqqan.
Temirlan Zaısan qalasyndaǵy Lomonosov atyndaǵy orta mektepte 7 synypta oqıdy. Talaby taýdaı órenniń anasy Almagúl Túsipjanovanyń aıtýynsha, únemi jańashyldyqqa umtylatyn ol bastaǵan isin sońyna jetkizbeı tynbaıtyn eńbekqor.
«Temirlan bizdiń úıdiń kenjesi. Kishkentaı kezinen bı bılep, án aıtqandy jaqsy kóredi. Óse kele rýbık tekshesin qurastyrýǵa qyzyǵýshylyǵy oıanǵan. Birde ol bizge ınkýbator jasaǵysy keletindigin aıtty. Tipti ony qalaı isteıtinin búge-shúgesine deıin túsindirdi. Sóıtip ulymyzdyń bastamasyna qoldaý bildirdik. Ákesi oǵan eski tońazytqysh pen kerekti qural-jabdyqtardy ákelip bergen soń, Temirlan birden iske kiristi», - deıdi sheshesi.
Osylaısha jas ónertapqysh 22 naýryzda ınkýbator jasaýdy bastaǵan. Aldyn ala jospar quryp, qalaı isteıtinin qaǵazǵa ret-retimen túsirgen.
«Eń birinshi tońazytqyshty burǵymen tesip, jeldetkish jasadyq. Sodan keıin oǵan termorettegish pen gıdrometr ornattyq. Termorettegish arqyly biz jumyrtqaǵa kerekti temperatýrany rettesek, al gıdrometr apparattyń ylǵaldylyǵyn tekserýge múmkindik beredi. Sondaı-aq transformator qoıyp, tońazytqyshtyń ishin jeldetip otyrdyq», - deıdi oqýshy.
Bári ázir bolǵan soń ol ınkýbatordyń ishine 95 jumyrtqa salypty. Arada bir apta ótken soń ovoskoppen tekserse onyń 11-inen balapan shyqpaıtyny belgili bolǵan.
«Jıyrma bir kúnnen keıin 30, al kelesi kúni 20 balapan shyqty. Sóıtip, 84 jumyrtqadan 50 balapan aldyq. Olarǵa alǵashqy aptada ár 2 saǵat saıyn jem berdim. Qazir 3 saǵatta bir tamaqtandyramyn», - deıdi Temirlan Erlanuly.
Aldaǵy ýaqytta da ol ınkýbator arqyly jumyrtqadan balapan shyǵaryp, bul isin kásipke aınaldyrǵysy keledi. Áke-sheshesi de uldaryna qoldaý kórsetýge ázir ekendikterin jetkizdi.
