ShQO-da jas kásipker mysyr taýyǵyn asyrap júr

Meırambek Álıhannyń Qytaıdan qonys aýdarǵanyna bir jyl bolǵan. Mysyr taýyǵyn ósirýdi sol jaqta úırengen eken. Qazir sol kórgeni boıynsha óz bıznesin bastap otyr.

«Qytaıda bulardy merýert taýyq dep ataıdy. Men jumys istegen kásiporynda myńdaǵan taýyq ósiretin. Bul qustardyń babyn, qandaı jem jeıtinin, qandaı kútim kerek ekenin jaqsy bilemin. Sondyqtan, osy iske bet burdyq» - deıdi jas kásipker.

Aıtýynsha, jubaıy ekeýi de «Bıznes bastaý» baǵdarlamasy boıynsha kásipkerlik negizderin oqyp, iskerliktiń álippesin meńgergen. Al «Nátıjeli jumyspen qamtý» baǵdarlamasy boıynsha beriletin grantqa ınkýbator apparatyn satyp alǵan. Mysyr taýyǵynyń 50 balapanyn Almaty oblysynan tapsyryspen aldyrypty. Bular jetilgen soń jumyrtqasyn osy ınkýbatorda shaıqaıdy.

«Apparat 250 myń teńgege shyqty. Bir jolda 1056 jumyrtqa shaıqaıdy. Odan úlkenin alýǵa granttyń aqshasy jetpedi. Reseıden 500 qazdyń jumyrtqasyna tapsyrys berip qoıdym. Olardy da osy ınkýbatorda shaıqaımyz. Buıyrsa mysyr taýyǵynyń sanyn 3000-nan asyrsam degen oı bar» - deıdi Meırambek.



29 jastaǵy jigit qustyń bul túrine Almaty men Astana meıramhanalarynda suranys joǵary ekenin aıtady. Biraq alǵashqy ónimdi zaısandyq jerlesterine usynbaq. Al keleshekte halyqaralyq ınternet saýda jelisi arqyly satýdy jolǵa qoımaqshy.

«Naryqta bir jumyrtqasynyń ózi 350 teńge turady. Halyqaralyq ınternet saýda saýda jelisine taýar óndirýshi retinde kirý úshin qustyń basy 3000-nan asýy tıis eken. Bir kelgende 2000 dana jumyrtqa tapsyra alatyn deńgeıge jetsek, ózderi-aq áketip otyrady. Menen tek veterınarlyq standarttardy qatań saqtaý talap etiledi. ıAǵnı syrtqa tasýǵa eshqandaı shyǵyn ketpeıdi. Ol mejege jetý úshin áýeli 0,4 gektar jer alyp, arnaıy qorajaı salý qajet. Qazir sol jer rásimdeý máselesimen aınalysyp júrmin. Osy másele jyldam sheshilse, isim alǵa basyp keter edi» - deıdi jas kásipker.