ShQO-da jas kásipker qymyzdan balmuzdaq daıyndap, kásibin dóńgeletip otyr
ShYǴYS QAZAQSTAN OBLYSY. QazAqparat – Abaı aýdanynda turatyn 21 jastaǵy Aıdyn Serikqazın qymyzdan balmuzdaq daıyndap, paıda tabýda, dep habarlaıdy QazAqparat tilshisi.
Aıdyn mamandyǵy boıynsha tehnık baǵdarlamashy, ýnıversıtet túlegi. Ol qymyzdan balmuzdaq jasap shyǵarý ıdeıasyn júzege asyryp, 500 myń teńgelik memlekettik grantqa ıe bolǵan. Alǵan aqshaǵa arnaıy apparat satyp alǵan.
«Ideıa meni kópten beri qyzyqtyryp júr edi. Bizdiń naryqta ulttyq ári paıdaly qymyzdan jasalǵan ónim túrleri kemde-kem. Sonymen qatar balmuzdaqqa jas ta, bala da áýes. ıAǵnı densaýlyqqa paıdaly tabıǵı ónim kúndelikti tirligimizde qoldanylsa, halyq densaýlyǵyna zor septigin tıgizeri anyq», - deıdi jas kásipker.
Aıdynnyń alǵa qoıǵan jospary kóp, talaby zor. Aldaǵy ýaqytta Abaı aýdanynda ǵana emes, óńir boıynsha saýda oryndaryn ashýdy kózdep otyr.
Jalpy, Shyǵys Qazaqstanda «Jas kásipker» bilim berý jobasy boıynsha myńnan astam adam bıznes negizderin oqyp shyqqan. Olardyń basym bóligi jeńildetilgen nesıe men tegin grantqa qol jetkizdi. Bul týraly oblystyq ákimdik otyrysynda ishki saıasat basqarmasynyń basshysy Irına Smıt málimdedi. ıAǵnı joba aıasynda joǵary oqý ornyn támamdaǵan jáne jumyssyz júrgen jastar ózderiniń bıznes ıdeıalaryn júzege asyrý múmkindigine ıe bolǵan.
«Oblysta jastar kásipkerligin damytý boıynsha arnaıy baǵdarlamalar men qoldaý sharalary jolǵa qoıylǵan. Óńirde jas otbasylar úshin turǵyn úı máselesin sheshý, jumyspen qamtý, sapaly bilim berý, densaýlyǵyn jaqsartý jáne áleýmettik qamtamasyz etý boıynsha aýqymdy jumys atqarylýda. Búgingi tańda jergilikti bıýdjet esebinen 1046 stýdent joǵary oqý oryndarynda bilim alyp jatyr», - deıdi óz sózinde oblys ákimi Danıal Ahmetov.
Jalpy, Shyǵys Qazaqstan óńirinde jastar arasyndaǵy kásipkerlik keń qanat jaıyp keledi. Máselen, «Bıznestiń jol kartasy 2020» memlekettik baǵdarlamasy aıasynda 15 jas kásipker 34 mln teńge somada grant alǵan.
