ShQO-da jappaı tártipsizdikke qatysqan 300-den astam adam jaýapqa tartyldy

ÓSKEMEN. QazAqparat – Shyǵys Qazaqstan oblysynda jappaı tártipsizdikke qatysqan 300-den astam adam jaýapqa tartyldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetinshe, búgingi tańda óńirdegi jaǵdaı turaqty. Tótenshe jaǵdaı kezinde polıtsııa qyzmetkerleri kúsheıtilgen rejımde qyzmet atqarýdy jalǵastyrýda.

«Blokposttar arqyly kólikterdiń júrip-turýyna, kirýine jáne shyǵýyna shekteýler engizildi. Onda qujattar, jeke zattar, avtokólikter men júkter tekserilýde. Sondaı-aq oblys boıynsha kópshilik jınalatyn is-sharalardy ótkizýge tyıym salynǵan. Kommýnaldyq obektiler shtattyq rejımde jumys isteýde. Shyǵys Qazaqstandaǵy tártipsizdikter kezinde tonaý faktilerine jol berilgen joq. Qoǵamdyq kólik turaqty qatynaýda, al oblysishilik avtobýs jumysy qalpyna keltirildi», - delingen aqparatta.

Jappaı tártipsizdikke qatysqan 322 azamat ákimshilik jaýapkershilikke tartyldy. 80 adam ýaqytsha ustaý ızolıatoryna qamaldy. Budan bólek, 8 is boıynsha sotqa deıingi tergeý amaldary bastaldy.

«Oblys boıynsha 92 polıtseı men Ulttyq ulannyń 19 áskerı qyzmetshisi jaraqat aldy. Tártipsizdikke qatysqandar ishinen 100-den astamy jaraqat alyp, 3 azamat kóz jumdy», - delingen habarlamada.