ShQO-da janýarlardy azaptap, vıdeoǵa túsirgen qyz polıtsııaǵa jetkizildi

ÓSKEMEN. KAZINFORM – Shyǵys Qazaqstan oblysynda 17 jastaǵy qyz janýarlardy azaptap, vıdeoǵa túsirip kelgen.

Jasóspirim qyz mysyqtardy qalaı sýyqta qatyrǵanyn vıdeoǵa túsirip kórsetken. Sonymen qatar qustar men úı janýarlarynyń etin qaınatyp kórgeni týraly da aıtqan. 

Polıtsııa qyzmetkerleri qyzǵa qatysty tergeýdi bastady.

— Atalǵan fakti boıynsha 17 jastaǵy qyz anyqtalyp, ata-anasymen birge polıtsııa bólimine jetkizildi. Qazirgi ýaqytta tekserý amaldary júrgizilip jatyr. Olarǵa qoldanystaǵy zańnama talaptary men zańsyz áreketterdiń jaýapkershiligi jóninde túsindirý jumystary júrgizildi, — dep habarlady ShQO Polıtsııa departamentinen.

Vedomstvo dereginshe, materıal kámeletke tolmaǵandardyń quqyqtaryn qorǵaý jónindegi komıssııaǵa joldanady. Tıisti sheshimdi sol komıssııa músheleri qabyldaıdy. 

Eske salsaq, osyǵan deıin Qyzylorda qalasyndaǵy úılerdiń biriniń aýlasynda 20-dan astam ıt pen mysyqtyń óli kúıinde tabylǵany týraly beınejazba taraǵany habarlanǵan.