ShQO-da jańbyrdan soń ózen sýy kóterildi
ÓSKEMEN. QazAqparat - Shyǵys Qazaqstannyń Altaı aýdanynda Turǵysyn ózeni tasyp, sonyń saldarynan sý elektr stansasy salynyp jatqan aýmaqqa qaýip tóndi, dep habarlaıdy QazAqparat tilshisi
Áleýmettik jelide taraǵan sýretter men vıdeodan qurylys alańyna sý ketkenin kórýge bolady. Jeli qoldanýshylary atalmysh aýdanda tolassyz jaýyn saldarynan Turǵysyn ózeniniń sýy kóterilip jatqanyn jarysa jazdy.
Degenmen, oblystyq tótenshe jaǵdaılar departamentiniń mamandary QazAqparat tilshisine eshqandaı eldi mekenge sý alý qaýpi tónbegenin aıtty.
«Bizdiń sondaǵy mamandardyń habarlaýynsha, ózen sýy kóterilgenimen, arnasynan aspaǵan. Eshkimdi qaýipsiz aýmaqqa kóshirý qajettigi týyndamady. Kómek surap, shaǵym aıtqandar da joq. Eldi mekenderge de eshqandaı qaýip tónip turǵan joq. Ázirge qolymyzda budan ózge málimet joq» - deıdi departamenttiń baspasóz qyzmetiniń basshysy Anastasııa Sklıar.
Al Parygıno aýyldyq okrýginiń ákimi Vadım Pıgarev oqıǵa ornynda barlyq jaýapty qyzmetterdiń júrgenin, jaǵdaıdyń baqylaýda ekenin aıtady.
«Jańa ǵana qurylystyń basynda bolyp qaıttym. Aýdan ákimi men aýdan prokýrory da osynda júr. Eldi mekenderge tóngen qaýip joq. Barlyǵy baqylaýda. Jańbyr saldarynan ózen sýy kóterilip ketken. Bar bolǵany osy» - deıdi Vadım Pıgarev.
