ShQO-da jańajyldyq demalys kúnderi polıtsııaǵa 1200-den astam qońyraý tústi
ÓSKEMEN. QazAqparat – Shyǵys Qazaqstan oblysynda jańajyldyq demalys kúnderi «102» jedel arnasyna 1200-den astam qońyraý túsken, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine qaraǵanda, jańajyldyq demalys kúnderi tártip saqshylary kúsheıtilgen jumys rejımine kóshti. 31 jeltoqsannan 1 qańtarǵa qaraǵan túnde 500-ge jýyq zańbuzýshylyq jaıly aryz túsken. Budan bólek, jańa jyldyń birinshi kúninde 700-den astam azamat polıtsııaǵa túrli ótinish jazdy.
Taldaý kórsetkendeı, túsken ótinishterdiń negizgi bóligi Óskemen qalalyq Polıtsııa basqarmasy Úlbi polıtsııa bóliminde tirkelgen.
«Oblys joldarynda 1 jol-kólik oqıǵasy bolyp, odan bir adam zardap shekti. Kólik quralyn mas kúıde tizgindegen 10 júrgizýshi anyqtaldy. Olarǵa qatysty QR ÁQBtK-niń 608-baby, 1-bóligi boıynsha ákimshilik is qozǵaldy», - dedi ShQO PD bastyǵy Saǵat Mádıev.
Jańa jyl qarsańynda polıtsııaǵa túsken qońyraýlardyń 74-i otbasylyq janjalǵa baılanysty bolǵan. Sondaı-aq 31 jeltoqsannan 1 qańtarǵa qaraǵan túnde 15 urlyq faktisi tirkeldi.
