ShQO-da janarmaı tasıtyn kólikke soǵylǵan Lada Granta júrgizýshisi kóz jumdy
ÓSKEMEN. QazAqparat – Shyǵys Qazaqstan oblysy Glýbokoe aýdanynda janarmaı tasıtyn kólikpen soqtyǵysqan «Lada Granta» kóliginiń júrgizýshisi mert boldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, jol apaty 2 qarashada saǵat 07:15 shamasynda Glýbokoe aýdanyndaǵy «Óskemen-Rahman qaınarlary» tasjolynyń 16-shy shaqyrymynda bolǵan.
«Lada Granta» markaly avtokóliktiń 48 jastaǵy júrgizýshisi qarsy jolaqqa shyǵyp ketip, janarmaı tasıtyn kólikpen betpe-bet soqtyǵysqan.
Sonyń saldarynan «Lada Granta» júrgizýshisi oqıǵa ornynda kóz jumdy.
«Atalǵan fakti boıynsha Qylmystyq kodekstiń 345-baby 3-bóligine (Abaısyzda adam ólimine ákep soqqan kólik quraldaryn basqarýshynyń jol júrisi qaǵıdalaryn buzýy) sáıkes sotqa deıingi tergeý amaldary bastaldy. Birqatar sot-medıtsınalyq saraptama taǵaıyndaldy. Sonyń qorytyndysy boıynsha protsessýaldyq sheshim qabyldanatyn bolady», - delingen aqparatta.
Foto: polisia.kz
