ShQO-da jańa jyldan keıin jaryq qymbattaýy múmkin
ASTANA. QazAqparat - Shyǵysenergotreıd qańtar aıynan bastap tarıfti kótermek, dep habarlaıdy «QazAqparat» HAA.
Atalmysh kompanııa elektr energııasyn usyný qyzmetiniń baǵasyn kóteretini jaıly málimdeme jasady.
Osyǵan deıin ShQO turǵyndary elektr qýatynyń 1 Kvt/saǵatyna 11,106 teńge tólep kelgen bolatyn. Eger jergilikti tabıǵı monopolııalardy retteý jáne básekelestikti qorǵaý komıteti Shyǵysenergotreıdtiń ótinishin maquldaıtyn bolsa, 5 qańtardan bastap baǵa 12,055 teńgege kóteriledi.
Búgin Óskemende ótken qoǵamdyq tyńdaý otyrysynda QR Ulttyq ekonomıka mınıstrliginiń básekelestikti qorǵaý jáne tabıǵı monopolııalardy retteý komıteti departamentiniń ShQO boıynsha dırektory Qaırat Orazbaev Shyǵysenergotreıdtiń sońǵy birneshe jyldyń kóleminde mundaı ótinishpen 5 ret kelip, beseýinde de baǵanyń kóterilýine ruqsat berilmegenin aıtty.
«Bul joly da biz ótinishtiń qanshalyqty zańǵa sáıkes keletinin tekseremiz. KEGOK, Kaztsınkenergo, ShQ REK sııaqty energııa óndirýshi mekemeler ózderiniń satyp alý baǵamdaryn kóterip jibergenin de aıta ketý kerek», - dedi ol.
Qaırat Orazbaev, turǵyndardyń kózaqarastaryn da esepke alyp, ońtaıly sheship qabyldanatynyn aıtty.
Daryn Nursapar
