ShQO-da jańa jyldan keıin nan baǵasy qymbattaı ma

ÓSKEMEN. QazAqparat – Shyǵys Qazaqstan oblysynda jańa jyldan keıin nan baǵasy qymbattamaıdy. Aýyl sharýashylyǵy basqarmasynyń basshysy Vladımır Gaılamazıan osylaı málimdedi, dep habarlaıdy QazAqparat tilshisi.

Vladımır Gaılamazıannyń aıtýynsha, áleýmettik mańyzy bar azyq-túlik baǵasynyń kóterilmeýi úshin tıisti sharalar qabyldanyp jatyr. Onyń ishinde nannyń qymbattamaýyna basa nazar aýdarylǵan.

«Keler jyldan bastap bólke nannyń ortasha quny 90 teńgeden aspaýy úshin áleýmettik nan óndirýmen aınalysatyn kásiporyndar naryqtaǵydan áldeqaıda tómen baǵadaǵy unmen qamtamasyz etiledi. Osylaısha, jańa jyldan keıin nan baǵasy óspeıdi dep kútilýde», - dedi ol.

Vladımır Gaılamazıannyń sózinshe, Óskemen qalasyndaǵy dúkenderde áleýmettik baǵadaǵy nan aldaǵy ýaqytta da satyla bermek. Baǵany turaqtandyrý maqsatynda qala ákimdigi «Eko-agro» jáne «Hlebozavod Karavaı» JShS kelisshartqa otyrdy. Sonyń nátıjesinde, dúkenderde birinshi sorttaǵy bólke nannyń baǵasy 85-95 teńge bolmaq.