ShQO-da jańa jylý qubyrlary aýyldyq okrýg ákiminiń ákesiniń úıine tartylǵan

ÓSKEMEN. KAZINFORM — Shyǵys Qazaqstan oblysy Samar aýylynda quny 1,7 mlrd teńge bolatyn jylý jelilerin tartý jobasyna qatysty daý shyqty. 2 myń jeke turǵyn úıdiń ishinen memlekettik jobaǵa tek aýyldyq okrýg ákiminiń ákesine tıesili bir ǵana úı engizilgen.

ShQO-da jańa jylý qubyrlary aýyldyq okrýg ákiminiń ákesiniń úıine tartylǵan
Foto: Pixabay

Jylý magıstralin qaıta jańǵyrtý jáne tartý jumystary aýdan ortalyǵy úshin tarıhı oqıǵaǵa aınaldy. Óıtkeni buǵan deıin aýylda ortalyqtandyrylǵan jylý júıesi bolmaǵan. Bıýdjet esebinen júzege asyrylyp jatqan jobanyń birinshi kezeńinde 19 áleýmettik nysan men 24 kópqabatty turǵyn úıdi jylýmen qamtý kózdelgen. 

Zańbuzýshylyq aýdan ákiminiń jeke qabyldaýy kezinde anyqtaldy. Jergilikti turǵyndar jańa jylý jelisine jeke sektordaǵy úılerdi de qosýdy surap kelgen. Alaıda aýdan ákimi tehnıkalyq jáne qarjylyq turǵydan munyń múmkin emestigin túsindirgen. Sebebi jobanyń birinshi kezeńi tek áleýmettik nysandar men kópqabatty úılerdi jylýmen qamtýǵa arnalǵan.

Osy kezde aýyl turǵyndary bıýdjet qarajaty esebinen Stroıtelnaıa kóshesi, 14-mekenjaıdaǵy jalǵyz jeke turǵyn úıge deıin qubyr tartylyp jatqanyn aıtyp, onyń qandaı negizde jobaǵa engizilgenin surady.

Anyqtalǵandaı, bul úı iri jergilikti sharýa qojalyǵynyń ıesine ári aýdandyq qoǵamdyq keńestiń múshesine tıesili. Ol — Samar aýyldyq okrýginiń qazirgi ákimi Marat Dıýsýpovtyń ákesi.

Tekserý nátıjesinde qubyr tartý jumystary úı ıesiniń jeke qarajaty esebinen emes, memlekettik joba aıasynda júrgizilgeni rastaldy. Jobany ázirleýshilerdiń túsindirýinshe, qujattama 2023 jyly daıyndalǵan. Sol kezde turǵyn aýmaqty aralaǵan aýdandyq TÚKSh bóliminiń qyzmetkerleri osy úıdi kórsetken. Al jobalaýshylar ǵımaratty qyzmettik turǵyn úı dep boljap, jylý jelileriniń syzbasyna engizgen.

— Turǵyndardyń ótinishinen keıin bul jeke úıge qaraı qubyr tartý jumystaryn dereý toqtatyp, tekserý júrgizdik. Jobaǵa tıisti túzetýler engiziledi. Stroıtelnaıa kóshesindegi úı smetadan alynyp tastalady. Ol qubyrlar Kolhoznaıa kóshesindegi segiz páterli turǵyn úıdi jylý jelisine qosýǵa baǵyttalady. Ol úıde negizinen qart adamdar turady. Jeke nysannyń memlekettik jobaǵa engizilýine baılanysty laýazymdy tulǵalarǵa qatysty qyzmettik tergeý taǵaıyndaldy, — deıdi Samar aýdanynyń ákimi Serik Jeńisov.

Tekserý qorytyndysy boıynsha aýdan ákimdigi jeke turǵyn úıdi bıýdjet esebinen júzege asyrylatyn qurylys jobasyna engizýge kelisim bergen sheneýnikterdiń áreketine quqyqtyq baǵa beriletinin málimdedi.

Sonymen qatar ortalyq jylý júıesin iske qosý merzimin keshiktirmeý úshin jylýmen qamtý syzbasy qaıta qaralyp, tıisti túzetýler engizýge joldanady.

Eske salsaq, buǵan deıin Pavlodarda úshinshi jylý elektr ortalyǵynda úsh qazandyq kúrdeli jóndeýden ótkeni habarlanǵan.