ShQO-da jańa týǵan náresteler perzenthanadan ulttyq kıimmen shyǵaryldy
ShQO Densaýlyq saqtaý basqarmasy baspasóz qyzmetiniń málimetine súıensek, Ulystyń uly qarsańynda jańa týǵan sábılerdi perzenthanadan ulttyq kıimmen shyǵarý jyl saıynǵy dástúrge aınalǵan. Aıagóz aýdanaralyq aýrýhanasynyń perınataldy bólimshesinde dúnıege kelgen on bala qazaqsha naqyshtaǵy kıimmen úılerine jiberildi.
«Osy kúnderi kindigi kesilgen nárestelermen qatar, aıdyń basynda týǵan egizderdi de kútip, barlyq qajetti neonatologııalyq kómek kórsettik. Olar ómirge kelgende salmaqtary bar-joǵy 1 200, 1300 gramm bolatyn. Nárestelerimizge mol densaýlyq, uzaq ǵumyr tileımin», - dedi aýrýhananyń bas dárigeri Shalqar Omarov.
Tarbaǵataı aýdany Aqjar aýylynyń turǵyny Aqmaral Zakarııanova mereke kúnderi tórtinshi ret ana atanyp otyr.
«Tosynsyıdy úlken tańdanyspen qabyldadyq. Shyǵýǵa jınalyp jatqanda bizge osy tamasha ulttyq kıimdi syıǵa tartty. Naýryz meıramy qutty bolsyn!», - dedi Aqmaral.
№2 Tarbaǵataı aýdandyq aýrýhanasynyń bas dárigeri Eljan Manarbekovtyń aıtýynsha, eń ádemi kıim – ultyńnyń kıimi.
«Qazaq halqynyń ulttyq kıimderiniń túri de, úlgisi de erekshe. Ulttyq kıim ata-babamyzdan qalǵan ǵajap muramyz, asyl qazynamyz. Óskeleń urpaqqa dástúrlerimizdi dáripteý - bizdiń mindetimiz. Áz-Naýryz ár shańyraqqa qut-bereke ákelsin», - deıdi ol.
