ShQO-da jalǵan vaktsına pasportyn jasap kelgen medqyzmetkerler ustaldy

ÓSKEMEN. QazAqparat – Shyǵys Qazaqstan oblysynda jalǵan vaktsına pasportyn jasaýmen aınalysqan medıtsına qyzmetkerleri ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary jalǵan vaktsına pasportyn jasaıtyndardyń jolyn kesý maqsatynda birqatar sharany qolǵa alǵan.

Sonyń nátıjesinde osyndaı zańsyz qadamǵa barǵan medıtsına qyzmetkerleri anyqtaldy.

«Máselen, Shemonaıha aýdanyndaǵy emhanalardyń birinde jumys isteıtin 44 jastaǵy aq halatty ekpe saldyrmaı pasport jasap otyrǵan. Sonymen qatar mundaı fakti Semeı qalasyndaǵy medıtsınalyq mekemede tirkeldi. 27 jastaǵy qala turǵyny óziniń qyzmettik laýazymyn paıdalanyp, vaktsına pasportyn 10-15 myń teńge mólsherinde satyp kelgen», - delingen aqparatta.

Qazirgi ýaqytta osy faktiler boıynsha QR Qylmystyq Kodeksiniń 385-babyna (jalǵan qujat jasaý nemese qoldaný) sáıkes sotqa deıingi tergeý amaldary júrgizilýde.

Zańsyz áreketke basqa da adamdardyń qatysy bar-joǵy anyqtalýda.

Kúdiktiler 4 jylǵa deıin bas bostandyǵynan aıyrylýy múmkin.