ShQO-da jalǵan vaktsına pasportyn satqan taǵy bir adam ustaldy

ÓSKEMEN. QazAqparat – Shyǵys Qazaqstan oblysy Glýbokoe aýdanynda jalǵan vaktsına pasportyn satqan er adam ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, buryn sotty bolǵan 43 jastaǵy er adam vaktsına pasportyn qoldan jasap, 5 myń teńgeden satqan.

«Ekpe alǵysy kelmegen azamattar jalǵan pasport jasatý úshin oǵan jeke kýálikterin berip, banktegi esepshotyna suraǵan aqshasyn jibergen. Alaıaq kompıýterdegi arnaıy qosymshanyń jáne fotoshoptyń kómegimen vaktsına pasporttaryn jasady», - deıdi oblystyq PD bastyǵy Saǵat Mádıev.

Qazirgi ýaqytta kúdiktige qatysty QR QK-niń 385 (jalǵan qujat jasaý) jáne 190-baptary (alaıaqtyq) boıynsha sotqa deıingi tergeý amaldary júrgizilýde.

Esterińizge sala ketsek, osyǵan deıin Semeıde 15 myń teńgege vaktsına pasportyn satqan medıtsına mamandary ustalǵan bolatyn.