ShQO-da jalǵan nómir taqqan, 2 mln teńgeden asa aıyppuly bar júrgizýshi ustaldy
ÓSKEMEN. QazAqparat - ShQO-da jalǵan nómir taqqan, 2 mln teńgeden asa aıyppuly bar júrgizýshi ustaldy, dep habarlaıdy QazAqparat Polisia.kz saıtyna silteme jasap.
Jol-kólik oqıǵalarynyń aldyn alý jáne oǵan jol bermeý, túsindirý jumystaryn júrgizý, sońdaı-aq kólik qozǵalysy tártibin arttyrý maqsatynda 18 shildeden bastap Shyǵys Qazaqstan oblysynyń aýmaǵynda jol qozǵalysy qaýipsizdigi aılyǵy ótýde. Osy kezeńde joldarda, ásirese túngi ýaqytta patrýldik polıtsııa narıadtarynyń tyǵyzdyǵy artty.
13 tamyzda Óskemen qalasy PB patrýldik polıtsııa batalonynyń qyzmetkerleri Qabanbaı batyr kóshesinde jol qozǵalysynyń basqa qatysýshylarynyń ómiri men densaýlyǵyna qaýip tóndirgen Toyota avtokóligin toqtatqan. Kólik júrgizýshisi jol-kólik oqıǵasy ornynan jasyrynýǵa tyrysqan.
«Sergek qorǵaý» qosymshasynyń kómegimen qujattardy tekserý barysynda tártip saqshylary kólik júrgizýshisi Kókshetaý qalasynyń 32 jastaǵy turǵyny ekenin, sonymen qatar ol kólik quralyn júrgizýshi kýáliginsiz, jalǵan memlekettik tirkeý nómirimen júrgizgenin anyqtady. Belgili bolǵandaı, respýblıka boıynsha atalǵan nómirdiń 175 jol qozǵalysy erejelerin buzý faktisi tirkelgen, aıyppul somasy – 2 mln teńgeden astam«, - dep jazdy aqparat kózi.
Atalǵan fakti boıynsha júrgizýshige qatysty QR ÁQBtK-niń 590-babynyń 4-bóligi (Materıal Óskemen qalasynyń mamandandyrylǵan ákimshilik sotyna jiberildi), QR ÁQBtK-niń 612-babynyń 4-bóligi (30 AEK mólsherinde aıyppul), QR ÁQBtK-niń 590-babynyń 3-bóligi (15 AEK mólsherinde aıyppul) boıynsha ákimshilik quqyq buzýshylyq týraly hattama toltyryldy. Avtokólik qaryzdy tolyq ótegenge deıin arnaıy turaqqa qoıyldy.
Foto: polisia.kz
